home page ?


Ioios d'amor farai de ioi senblan,
Celan mon ioi ioios cortezamen!
Et als ioios amans ioiozamen
Fas prec ioios que del ioi qu'eu ai gran
Joiozamen fasson de ioi senblansa!
Que ben es tant mos iois sobreioios,
Que de mon ioi nais ioiosa chansos:
Tant ioios ioi m'a donat fin'amansa

E chantarai pois c'amors vol qu'eu chan,
Qu'estiers chantan, no-m pogra chantar gen
Ni far chanso per chantar avinen,
E pregarai chantadors del chan
Qu'il chanton gen mon chantar qui sobransa!
D'obra chantan totz los chanz cabalos,
Que del chant es chantabla la razos,
E-il mot chantan e-l chanz per acordansa.

Qu'eu chant d'un ris rizen, que-m tolc antan
Solatz e ris de mon cor en rizen!
Mas Na Belris l'autrer, un ior, rizen,
Mi rendet ris ab son rire baisan!
Per qu'eu rirai e ri de benenansa.
Que, s'aquel ris mi fetz de rire blos,
Sest ris m'a faig de ris tant aondos,
Que rizen ris denant tot iorn mi dansa.

De lai m'es natz us plazers, que-m platz tan
Qu'autre plazers no-m a sabor plazen
Pero aquel mi plai tant plazentemen
Que-m fai plazer chant, que no-m plac ugan
E plai mi fort quel plazers que m'enansa
Es plasentiers als plasens amoros!
Que mos plazers, s'autre plazers no-i fos,
Lur fai plazer e plazer l'esperanssa.

Alegre-m fai don m'alegri chantan
L'alegres bais qu'eu pres alegramen!
E l'alegranz alegres qu'eu aten
M'alegrara per mon grat alegran,
Pois serai plus alegrers qu'alegranssa.
Si m'alegra l'alegriers saboros
Qu'alegramens dels alegrers amdos
M'alegrarai et d'alegr'amistansa.

Jauzen, plazen, rizen, chantan, ioios
Mi fai iois, chanz, ris, plazers, alegransa.