prosody | miscellaneous |
Amics Robertz, fe qu'ieu dei vos, M'enueja d'avols companhos, Et enueja·m la mars e·l vens Que no·m sembla ni bos ni gens; Et d'orne que-s fai desdenhos, Lai on non es luecx ni sazos, M'enueg'e de paubres prezens. Cavaliers paubres erguillos Que no pot far condugz ni dos, M'enueg, e ries desconoisens Qui cuia esser entendens E no sap que vai sus ni jos. Et enueja·m. cel qui-s te bos, Que pauc ditz be e fai en mens. Li lauzengier e l'enujos M'enuejon molt e li janglos; Et enueja·m lonx parlamens, Et estar entre croyas gens; Et nom m'enueja trop iros E companhia de garsos, E cavaliers mal acuillens. Hom mensongiers, mais e ginhos M'enueja, et hom trop cobeitos; Et enueja·m comensamens Malvatz e crois definimens; Et hom m'enueja trop gelos, E sel qui es trop envejos M'enueja, et hom trop retenens. Rics hom alegres e joios, Larcx e francx e de bel respos Me platz, e bels captenemens E cortz on vei homes valens; E platz mi bela messios, Et hom de pecat vergonhos Me platz, e bos repentirnens. |