home page ?


Un sirventes trametrai per messatge
Aqui ont a tracios son estatge,
Ad Esteve, que tot jorn fa la vela.
Qu'om mielhs non mazela
Autruy porc ni flagela
Ni mielhs non coutela
Sos servidors manjan.
L'enfan
De que fes guavela
Li retrairay chantan
Aitan
Tro en Compostela,
Pes deschaus e ploran,
S'en an,
Qu'en questa rudela
A fag trop de mazan.

El mon non ac leon aital salvatge,
Quant hom lo fier, non camge son coratge!
Mays Esteves a trop mala ratela,
Que a l'escarcela
Ten apcha o astela.
Malament capdela
Sels qu'entorn lui estan!
Del bran
Per la guarguamela
Empenh si lo trenchan
Guaban!
Tol bras o ayssela
Tot rizen e parlan,
Chuflan!
Pueys, qui lo 'n apela,
No-s defen tan ni quan.

Clergue volon aver tal avantatge
Qu'a l'autre gen fan pagar lo muzatge,
Qu'ilh mandaran a mestre badaurela
Que-s cenh' espadela
E que-s meta a cela.
Cors, quan barutela,
Ades met atretan
Quan van
Aquilh gens fradela,
Que, sol clergues o man,
Iran
Barreiar Tudela
E-l Puey e Monferran,
Cujan,
Que ja la novela
Ni-l dreyt non apenran.

Clergue gieton cavaliers a carnatge
Que, quan lur an donat pan e fromatge,
Los meton lai ont hom los encairela.
Mes la lor forsela
Guardan be de lamela,
E l'autruy cervela
Non planhon si s'espan
...an.
Tan sabon de truela
Qu'ab l'autruy man, ses gan
Penran
Lo chat que revela,
Sol qu'elhs no-y aion dan.
Que quan
Son a l'escudela,
Quascuns val un Rotlan.

Qui-m fizava la renda e-l pezatge
De Polomnhac, ges non ai en coratge
Que ieu n'embles lo pretz d'una fivela,
Mas qui jovensela
Mi comandava bela,
Paor ai piuzela
No fos al cap de l'an
Viran,
Qu'ans qu'aur ni vayssela
Ni denier ni bezan
Sonan
Penria piuzela
Tozeta, benestan,
Trepan
Aital jarbaudela
Que m'anes embrassan.