| |
|||
| prosody | miscellaneous |
S'ieu fos amatz o ames Eu chantera qualque ves, Mas car aisso non i es, Eu non sai de que-m chantes. Pero en cor ei Que, si a Deu plai, Questa ves essai Consi chantarei De m'ami quan l'aurei. Lo plu fis drutz qu'anc nasques For'eu, si amia agues, Que, ja plazer no-m fezes, Eu fora sos homs ades. Qu'una ves amei E per aisso sai D'amor consi vai, Ni com amarei Autra ves, quan mi volrei. Amors, qui la semenes, Nasquera aitan espes Que d'un grat n'agra hom tres E d'un plazer mais de des, E vint d'un donnei! E d'un jai verai Nasqueran cent jai, Tro-m disses: eu n'ei Mil tanz que non semenei. Dompneis es tornatz atres, Que li pros e li cortes N'an los mals, e-ill croi los bes! Que qan donpnas an bon pres Volon qu'om pros prei E fan al savai! Lo fals n'a: lo fai E-l fis: lo farei! Per qu'eu lor lauzor non ei. D'ar mantas, falsas en pes, Fan estar los descortes E dan penas totas ves Als leials amanz confes! Per qu'om lor deu frei Metre, quar s'eschai Que aion esmai. Ieu dic las qu'eu sei: De las falsas vos dic uei. Mas ges non lur nei Qu'el mal qu'om en trai Son plazer verai A home qui prei Ab tam fi cor com ieu ei. |