| prosody | miscellaneous |
Tan vei lo segle cobeitos Plen de maleza e d'engan, Que ges lo paire en l'enfan No·s pot fizar-denguns d'abdos. Per qu'ieu n'estauc tan consiros Qu'a penas en puesc nuil ben dir, Si doncx non volia mentir: Per qu'ieu volgra c'autre monz fos. Tan son li orde envejos, Plen d'erguelh e de mal talan Que, per sert, mais sabon d'engan Que raubadors ni mals cussos. E si podon parlar ab vos De ren que·us queran de non dir, Non lur o poires escrimir Plus que s'eras fraire abdos. Per deniers trobares perdos Ab lor, s'aves fach malestan! E ezuriers sebeliran Per aver, tan son cobeitos, Mas ges lo paubre sofrachos Nuil temps non er a sebelir, Ni vezitar ni acuillir, Si non era pozestados. E d'aco baston lor maizos E belz vergiers a l'ombr' estan! Mas ges li Turc ni li Persan Non creiran Dieu per lur sermos Qu'il lur fassan, car paoros Son de passar con de morir, E aman mais de sai bastir Que lai conquerre los fellos. En aital orde dos botos Non daria ni lo pres d'un gan Qu'il non fan mas querre tot l'an De que compran de bons peissos, Blancx pans e bons vins saboros, E volon caudament vestir Que·l fretz non los puesqu' envazir. Dieu plagues de lur orde fos— Sol que fos ma salvatios Mas tan paucx en vei assantir Que aco me fai refrezir: Per qu'eu d'els non soi talentos. |
Metrical pattern: 496b