| prosody | miscellaneous |
Un sirventes fauc en luec de jurar E chantarai, per mal e per feunia, De malvestat que vei sobremontar, E decazer valor e cortezia. Qu'ieu vei als fals los fis amonestar, E als lairos los leials prezicar, E-l desviat mostron als justz la via. Enganatz es fols hom en son cuiar: Qu'ieu cuiava que engans e bauzia Fezes son don decazer e baissar, Et ara-l sors e-l creis e-l multiplia. Meravilh me s'anquar no van raubar, Pus malvestat ama hom e ten car E leialtat ten hom a fantaumia. Glotz en perier non vol vezer son par, E li clerc an aquella glotonia Qu'en tot lo mon non volrian trobar Home mas els que tengues senhoria! Que-l feiron leis per terras guazanhar, Com poguesson creisser e non mermar: Ades fai pro un petit de bailia. A tantas mas vei clergues assaiar, Que totz lo mons er lur, cuy que mal sia. Quar el l'auran ab tolre o ab dar, O ab perdon o ab ypocrizia, O ab absout o ab escuminjar, O ab prezicx o ab peiras lansar, O el ab Dieu o el ab diablia. En Bostia, digatz m'a N'Azemar Que, si se vol defendre de clersia, Mielhs qu'en lur fag se gart en lur parlar, O si que non en badas s'armaria. Qu'el trazon so don hom no-s pot gardar, Que quant autre fan enganas fargar, Et el engans per major maistria. Jeu non aus dir so que el auzon far, Car ans rascas non amet penchenar Ni el home qui lor dan lur castia. |