| |
|||
| prosody | miscellaneous |
Un sirventes vuelh far dels auls glotos Que vendon Dieu e destruzon la gen, E prezicon qu'el vivon sanctamen. Ab bel semblan cuobron lurs trassios: Per qu'ieu no vuelh jamais esser selaire De lurs crois faitz on es deslialtatz, Pus c'atrestant e ves Dieu encolpatz Sel que manten lairon com es lo laire. Lairon son el e renhon sobre nos: Doncx ben em fol et ab pauc d'essien, Pus laires es qui a lairon cossen. Que farem doncx si no·ns en val razos Cridem lo mal qu'ilh fan o que fan faire, Si que puescon conoisser lors peccatz E no·s tenga negus asseguratz Si ve desfar son vezi o son fraire. Fraire son tug, mas no son pas engals Las partz qu'ilh fan dels bes de Jhesu Crist. Ai verais Dieus, c'ab-ton sanc nos remsist, Veias com es sancta glieiza venals Que hom no i a dignetat ni prebenda Si non lur fai soven donar secors, O non es neps o filhs de tos pastors, O non cossen lor deslial fazenda. Faitz an felons e ditz esperitals, Ab votz tenen et ab coratge trist! Ieu cug qu'el son messatge d'Antecrist: Gardatz si d'els pot ben issir totz mals. Mais Dieus en fai tot jorn trop bel'esmenda: C'on plus aut son pujat en las honors, Cazon plus bas ab penas et ab plors, El fons d'ifern, e autre cuelh la renda. Rendas queron per laissar als parens, E anc donatz no fon tan lor amicx Que no sia per els tengutz mendicx Si non lor fai remembransa prezens. Sel qui conois e sap Santa Ecriptura Es pauc prezatz si no sap de trafey E non conois la lur deslial lei, Que fan semblar de tot mal tort drechura. Gardon si sel que fan de tort drechura Que solamen fauc de lor ma rancura. |
Metrical pattern: 624c