| prosody | miscellaneous |
De paraulas es grans mercatz, E ie'n soi de parlar logatz: Per qu'es drechz que viutat en fassa, Car lenga logada non lassa. Mas li genz mena aital nauza C'a penas denguns i repauza. L'uns conseilla e l'autre brama! L'uns menassa e l'autre clama, L'uns maldis e l'autre folia, L'autre dis non enaissi sia. Can l'uns plora e l'autre ri! Can l'uns quer aiga e l'autre vi! Can l'uns encaussa, l'autre fui! Can l'uns si cella, l'autre brui. E qui parla en aital bruda, Aco es paraula perduda, E perduda es eissamen Paraula cant hom non l'enten. C'aitan valria mantas ves C'om a las parez o dieises. Com a ganren d'omes que son. E cent d'aquelz a per lo mon, Can auran un conte auzit, Ja no sabran que s'aura dit. Et a ben talen de parlar Qui ab aquelz si met contar. D'autres n'i a que-s fan senat C'an de repenre voluntat Et an so enpres per aital-- Que diguas ben o diguas mal-- Qu'enanz ora seres repres, Cais qu'el es savis e cortes Et es parlans e sap ganre. Mas denguns homps non au ni ve Que mantas ves a mais de sen Lo repres qu'aquel que repren: Tals cuia repenre autrui Que l'autre pot repenre lui. Mas en aiso son tuch obrier Que cascuns fa de son mestier: Homps mals quan fa sa malvestat Co-l bons si fazia bontat. Lo bons escouta per apenre E-l mals per talen de repenre. Lo bons escouta e enten Per aital bon entendemen, Si auzia mot dit de be, Que aquel apren e rete, E-l mals homps si met en escot Si auzia dire mal mot! E cant l'au, mena gran gangalha, E non es ges quazuch en pailla. E aquist dui fan que cortes, Car quascuns pren so que sieu es. Que-l bons s'en va ab son bon mot E laissa estar l'avol tot! E-l mals s'en va ab so mot mal, E si res a bon, non li'n qual! Que semblanz es a barutel Que reten lo lach e da-l bel E laissa en passar la flor. E qui retenra lo peior De so qu'au dire, ieu enten Qu'el laissara la flor per bren. |