| prosody | miscellaneous |
De selhs qu'avetz el sirventes dich mal, Senh' En Raimon, — vos vuelh aiso esdir: Que aian tort, qu'om los deia punir. . . . . . . . . . . tant si sento leyal, E fan dever e tenon la ley Dieu. D'aquestz mestiers los vos razone ieu, Que quan tug fals serian lonjamen, La tenezos e·l costuma·ls defen. S'ieu ai tengut lonc temps lo vostr' ostal, No'us pessetz pas leu lo·m fassatz gurpir Ni de lains vuelha jamais issir, Que·l tenezos m'en aiuda e m'en val. E s'ieu ia vuelh estrangolar romieu, Perdonat m'er ab que done del mieu. S'aver non ai, forfach ai pendemen, E s'ai aver, manh lag tort me defen. Qu'a penas a hom amic tan coral E que·s guare en totz faitz de falhir, S'aver non a, que ja·l sapcho ben dir, Ans diran tug d'aquelh que res no val: Mens prezatz er si non a pro del sieu. Trop val avers mas diable e Dieu: En conquer hom qui'n fai amassamen. Si mortz no fos, elh volgra per un cen. L'apostoli ·lh legat e·lh cardenal S'acordon tug et an fag establir Que qui no·s pot de trassion esdir, S'aver non a, fassa·lh hom lo senhal! E s'a aver. . . . . . .eu Donem li. . . . . . eu Que·lh r. . . . . . .men Mas. . . . . . lo sieu n. en Tot lo . . . . . de sal L. . . . . . e delir De mentir D'els n'a. al Piegz de. . . . . . es grieu. Aitan pauc pretz crestia com juzieu. E feira meyns si pel sanh lavamen Non esperes venir a salvamen. Caitiva gen, cum cujatz que de lieu Poscatz aver lo bon regne de Dieu, Tot jorn peccatz fazen ad ecien Non o crezatz ni aiatz tan pec sen. |
Metrical pattern: 577