| |
|||
| prosody | miscellaneous |
De sirventes faire no·m tueill E dirai vos razon per que! Qar azir Tort, aissi com sueill Et am Dreg, si con fis ancse. E qui qu'aia autre tezòr, Ieu ai leialtat en mon còr, Tan qu'enemic m'en son li desleial, E si per so m'aziron, no m'en cal. On plus d'omes vezon miei hueill E mens pretz las gens e mais me, Et on plus los siec pietz lur vueill, Et on mais los aug meins los cre, Et on plus intr'en lor demòr Mens ai de plazer en mon còr! Que s'ieu pogues viure de mon captal Ja non volgra sezer a lor fogal. Dels ricx malvatz barons mi dueill Quar son tan de malvestat ple! Mal m'es que la mortz no·ls acueill, E pietz quar vida los soste, E mal m'es, qan malvatz hom mòr, Car la malvestatz qu'a el còr Non mor ab el tot ensems per egal, Que non restes ab son fill a l'ostal. Manta carta vei e mant fueill On trop escrig que si conte: Que hom azir tort et ergueilh E laisse·l mal e fassa·l be! Mas trastotz lo mons d'or en òr A virat l'al re en son còr: Que hom laisse lo ben e fassa·l mal E·l dreg azir et am lo tort mortal. Ben camja civada per jueill E tiriaca per vere Et anguila per anedueill Qui laissa Dieu per auol re. Tant vai trassios a vil fòr Que si l'hom que plus n'a el còr La trazia en ple marcat venal No·l daria hom mezalha del quintal. Trachor, si vos triga, no·us mòr Que·l malvestatz qu'avetz al còr No vos mene a fort malvat ostal: Qu'anc non fon us que non anes a mal. |
Metrical pattern: 382p