| prosody | miscellaneous |
Ges non me sui de mal dir chastiatz, Qar de mal far la genz non se chastia. Que de mal far deu hom aver feunia E de feunia deu eissir mals glatz E de mal glat blasmes als encolpatz E de colpa pena als malfachors: Qu'en aissi vai lai on drechura reinha. E qan non es qui la colpa destreinha, A tot lo menz lo malditz e·l clamors Es als blasmatz ancta e desonors. Per so es crois homs malvatz apellatz Qar es us vas mals on estai feunia E cobeitatz e ergueills e bauzia, Tortz e mentirs e mala voluntatz: Ad aital vas es dicha malvestatz Si con es dich'al valen li valors! E malvestatz que los malvatz enpreinha Fai o aissi co nlo fuecs de la leinha, Que la destrui la flama e·l calors: Aissi destrui malvestatz sos seinhors. Qar destruitz es homs desapoderatz, Qan l'a sotz mes l'avolors res que sia: Qar son bon sen ha vencut la folia E·l tortz lo dreg e la vertut peccatz. Aquel homs es piejers que vis tornatz Don eissida es tota·l bona sabors De que pros homs jamais beure non deinha. E malvestatz que los barons enseinha Vira los tan de malvais en peiors Tro los ha voutz de lairos en trachors. Gaug deu aver qui non es lur privatz E qui no vol anar per aital via, Qar hom non pot aver la lor paria Si non es fals e glotz e renegatz Que lor aiut a far los lagz baratz. Per que volon glotos e raubadors Que tollan pan e vin e carn e leinha, Vaquas e buous, que neguns no s'en feinha, Vignas e pratz e terras e laors, Fieus e alos, mas e castels e tors. E·l diables, qu'a manz homes levatz, Que·ls montava tan aut cum far podia, Tro al derrier que los en deissendia En tan bas luoc que era deshonratz— Aqo fai el de las granz poestatz: Mals e felons e dezeretadors Cui diables conseilla et engeinha! E ja non vol que de Dieu lor soveinha, E mostra lor que segan aquel cors Que non teman Dieu ni predicadors. Et ieu azir home qu'en aissi reinha Tan que—si Dieus m'aconseilh ni·m manteinha— Non vueill esser un d'aquels tolledors Per tot l'aver de set emperadors. |
Metrical pattern: 517