| |
|||
| prosody | miscellaneous |
Mon chantar vueil retraire al cuminal De totas gens, e si·l deinhon auzir Ni l'entendon ni·l sabon devezir, Cascuns poira trair lo ben del mal. Que cobeitatz a tant sazit en brieu Lo mon que no·i cor dregz ni temon Dieu Ni no·i trob' om merce ni chauzimen Ni vergoinha ab lo plus de la gen. Rei e comte, bailho e senescal Volo·ls castels e las terras sazir A lur acort e paubra gent delir, E li baro son, li plus, atretal Que cascuns ditz: ieu penrai d'aco mieu, E ab tot son plus paure que romieu, E non tenon vertat ni sagramen E nos autre em d'aquel mezeis sen. Clerzia vol trastot l'an per egal Ab cobeitat gen caussar e vestir, E·l gran prelat volo·s tant enantir Que ses razon alargan lor deptal, E si tenes del lor un onrat fieu Volran l'aver e no·l cobraretz lieu Si non lor datz una soma d'argen O non lor faitz plus estreg covinen. Si morgue nier vol Dieus que sian sal Par trop manjar ni per femnas tenir, Ni monge blanc per bolas a mentir, Ni per erguelh temple ni espital, Ni canorgue per prestar a renieu, Ben tenc per fols san Peire e sant Andrieu Que sufriron per Dieu tan gran turmen S'aquist venon aissi a salvamen. Si capellan per trop beure anoal, Ni legistas per tort a mantenir, Ni albergier per lor oste trair Ni logadier per falsar lor jornal, Ni regidor ni baile ni corrieu Rauban la gen si salvan, non cre ieu Que menudet non reinhon follamen E sil qu'estan confes e peneden. Revendedor, obrier e menestral Iran ab Dieu, si lor o vol sufrir, Ab car vendre e ab menten plevir, E camjador e home de portal E renoier atressi com juzieu, E noirigier panan so c'om lor plieu, Laorador terras sensals menten, Obran festas e faitilhas crezen. A tota gen darai conseil leial, Si tot no·l sai a mos ops retenir: Que cadaus volgues ben far e dir A son poder, car plus de bon captal Non portarem escrit en nostre brieu, Can nos n'irem e rendrem comte grieu De totz los faitz, al jorn del jutjamen, Al franc senhor que·ns formet de nien. Ges qui·m repren mon chantar no m'es grieu Car man far ben si tot n'en fauc pauc ieu! Ab que la gen renhesson ben e gen, Pois pogran dir: de fol apren hom sen. |
Metrical pattern: 577