| prosody | miscellaneous |
Peire del Puei, li trobador Fan tenso de so que lur platz! Mas de vos vueilh qe-m respondatz, S'o sabes faire a razo, Que ieu vos partisc o e no. Per qal reman hom plus onratz E dic vos ben: qal qe prendatz Vencutz seres de la tenso. N'Aymerics, ab un tal doctor Conosc qe vos est encontratz Don a tot drech seres sobratz, E qe acses lo sen Cato! Q'anc homs non crei veses baro Per non dir for' en prez pujatz E per oc vei los fatz onratz Complir ab genta messio. Peire del Puei, de gran follor Conosc que vos etz encombratz Qar oc contra no raconatz, E ades proarai vos o: Q'ieu hai vist faire tracio A home qe n'era prejatz! Per qe ramas plus encolpatz Qar dis d'oc que dieisses de no. N'Aymerics, ges l'ocs pel trachor No-s franha a menz de bontatz! Mas per non dir, so es vertatz, Pert hom ric joi manta sazo, Tot placer, tot servir, tot do. Vilania'n creis, co sapchatz! Enujos es nos, ges no-m platz, Amics, e per vos sabez o. Peire del Puei, manta clamor Hai aucit d'oc, aisso sapchatz. E sai o pels baros malvatz Qe fan promessa senes do. E per so pres ieu mais lo no Qe l'oc, per q'om es apellatz Mencongiers e mal enseinhatz E l'en laisson siei compainho. N'Aymeric, oc son li meilhor, Per qe bos pretz es eissaussatz, E no ten las vils poestatz! Qe q'il digan, es no ses pro. Per q'ab l'oc met lo bon N'Ugo Del Bautz, on fis pretz s'es fermatz! E vos, el no qui qe-us vueilhatz, Raimon o Bertran o Pero Peire del Puei, l'oc e lo no Sera en Proenca jujatz Per mon senh' En Blacaz, si-l platz, Qe d'autre no-m sabria bo. N'Aymeric, be-m par de razo, Qar ell es francs e enseinhatz, E per lui er dicha vertatz! E ieu m'en vau dreg vas N'Ugo. |