| prosody | miscellaneous |
Pos ma boca parla sens E mos chantars es faitis, Vueil, ab bels motz gent assis, Dressar los entendemens Als malvais mal entendens Que cuion que vailla mais Homs messongiers que verais, E-l sen tenon a folia E-l drech tornon en biais. Ves enfern fa son eslais E-l govern ten ves abis Sel que vertat aborris Ni ab drechura s'irais. Que tal bast murs e palais Del drech de las autras gens Que-l segle desconoissens Dis que mot fa bona via Car es savis e creissens. Tot atressi con l'argens El fuoc arden torna fis, S'afina e asantis Lo bons paupres passiens En las trabailhas cozens, E-l malvais manens savais On plus gent si viest e-s pais Conquer en sa manentia Dolor e pena e pantais. Mas d'aco no-l pren esglais, Que gualinas e perdis Lo conortan e-l bons vis, E-l bens qu'en la terra nais, Don el es gauzens e guais! Pueis dis a Dieu en legens Qu'el es paupres e dolens, E Dieus, si li respondia, Poiria dire: tu mens. Semblans es als aguolens Crois homps can gen si garnis, Que de foras resplendis E dins val mais que niens. Ez es majers fenhemens Que si us escaravais Si fenhia papagais Can si fenh que pros hom sia Uns fals messongiers savais. Tals si fenh pros e valens, Car sol gent si viest e-s pais, Quez es malvatz e savais! Mas si los autres paissia Per aquo valria mais. |