prosody | miscellaneous |
Cals aventura Es aisso d'aquest mon Que la drechura No-i troba ga ni pon, Mas desmezura I vai per tot a fron E mou rancura E ausi e cofon. E mentirs mantas ves I nais aitan espes Que vertatz ni merces Ni patz ni conoissensa No-i trobon garensa E poders pren lo ses Lai on drech non a ges. Tan granz falhensa Aura el mon d'amor Que ben volensa No-i aura leu seinhor, Ni passiensa Ostal ni refreitor, Mas decrezensa Seira en loc d'onor, E cantars sera mutz E bells solatz destrutz E donars abatutz, Mas feincha soaveza Reinhara e falseza Et erguelhs escondutz Entr'els plus saberutz. Tortz e maleza E erguelhs eisamen! E cobeeza Ab trastot son coven, Et avareza An fait acordamen Consi franqueza Gieton d'entre la gen, E mora caritatz, E que bon' amistatz E patz e pietatz En nulh loc non remanha En val ni en montanha, Que-l fuocs es atuzatz Que-i a mes malvestatz. Ben es qui planha Can mals homs s'enrequis, Car lait guazanha Aco de sos vezis, Als uns mou lanha E los autres murtris! Peior companha Lor fa que n'Ezengris. C'aitals es sos acortz Qu'entro qu'el aia mortz Los plus rics e-ls plus fortz No-i aia acordansa! Aquo es la venjansa Que porta d'aquels tortz Que l'adus a mals portz. Cal benanansa Pot hom el mon aver Qui ve bobansa Venir a mal voler Que s'enavansa Per la gen decazer E fai semblansa De razo mentener Rams es de trasio Qui ab fencha razo Auci son companho! E mals homs non so cuda! Razos es deisenduda Cant us aips s'i apo Que a nom ocaizo. Dretz a mestier d'ajuda, E qui l'en ditz de no En pur dreg a pauc pro. |