| prosody | miscellaneous |
Qui ve gran maleza faire De mal dir no si deu taire: Per qu'ieu vuelh dir e retraire Que ricx homs dezeretaire Es piegers que autre laire, E fai diablia Peior que neguns raubaire, E tart si castia. Ricx homs quan vai per carreira, El a una companheira: Malvestat, que vai premeira E mejana e derreira! E grantz Cobeitatz enteira Li fai companhia E Tortz porta la senheira Et Erguelhs la guia. Ricx homs mals quan vai en plassa, Que cuiatz vos que lai fassa Quant autr'homs ri e solassa, A l'un mou play, l'autre cassa L'un maldi, l'autre menassa, E l'autr'afollia! E non fai joi ni abrassa. Si com far deuria. Ricx homs quan fai sas calendas E sas cortz e sas bevendas, De toutas e de rozendas Fai sos dons e sas esmendas E sos lums e sas offrendas, E de raubaria! E en guerras met sas rendas E en plaideria. Ricx homs mals quan vol far festa, Aujatz consi fai sa questa: Tant bat la gent e entesta Tro que deniers non lur resta! Que no·i cal venir tempesta Ni fams ni moria, Pueis fai cara molt honesta Qui no·l conoissia. Un pauc ai dig de la gesta Que dire volia Mas tan grans massa n'i resta Que fort pauc embria. |
Metrical pattern: 19c