home page ?


Sitot non ai joi ni plazer
Ni delieg dels bes d'aquest mon,
La razon m'en vir' al voler
De chantar! pero non sai don
Poirai penre que mi aon
A far sirventes entenden,
Tal que non desplass' a la gen,
S'ieu los repren de fallimen
On tug fallem, e no-ns guardam del latz
On quascus es pres, segon sos peccatz.

Pretz e ben fag laisson chazer:
Per que lialtatz se rescon
E merces non auza parer
En luoc, quar quascus la rebon.
E cobeitatz pela e ton
E rauba et acuza e pen.
Que negus doms non o enten
Mas quon breumen aya l'argen
De sos homes e-ls draps e-ls vis e-ls blatz!
Pueis no li-n cal si-ls cassa paupretatz.

Pauc son selh que volon temer
Dieu ni-ls mandamens qu'escrit son!
E fan tot lur dieu del aver,
E crezon que l'avers aon
A la mort! e no sabon on
Auran del senhor mandamen
Que venguan ses alongamen.
Ai tan dolen e tan temen
Venrem vas Dieu, quan nos aura mandatz,
Si non avem satisfaitz los peccatz

E doncx pus res no-ns pot valer
Que tug no passem al grieu pon,
E quascus dopta lo cazer
Del val on hom cai tan preon,
Cossi podem dormir un son
Que tenguam tort a l'autra gen
Qu'ieu vei que hom si mor dormen
Et autramen! per qu'ieu repren
Mielhs nos autres, qu'em carguat de peccatz
E no-ns membra de selhs que-s son passatz.

Aissi-ns laissa Dieus dechazer
Per los falhimens qu'en nos son
Que-ls Sarrazis fa tan valer
Que sobre nos son aurion,
Que venjars l'autrui sai cofon!
Clercx e prinses e l'autra gen,
Quascus quan pot de l'autre pren,
E fan temen ben e grieumen.
E-l sepulcres es del tot oblidatz,
E la terra on Jhesus Cristz fon natz.

Ar son valen selh que rizen
Sabon home decebre per baratz,
E ilh sostran so don er' arozatz.

Jezus Cristz men s'al jutjamen
Segon l'obra non es cascus pagatz:
Doncx ben es fols qui no-n esta membratz