prosody | miscellaneous |
Tals cuida be Aver filh de s'espoza Que no-i a re Plus qu'aquel de Toloza Quar s'esdeve Que li moillers cochoza Acueilh ab se Un lac baratador Don ilh rete, Plus vil qu'un autra toza, Un filh de que Fai eres al seinhor. Per so ai fe Que malvestatz si noza En tal qu'ieu cre Que fon filhs de prior. Tant es viratz Lo mons en desmesura Que falsetatz Es en luoc de drechura, E cobeitatz Creis ades e pejura, E malvestatz Es en luoc de valor, E pietatz A d'ostal sofrachura, E caritatz Fa del segle clamor! Ez es lauzatz Qui de Dieu non a cura, E pauc prezatz Qui vol aver s'amor. Qui, des aissai Entro a la Turquia E des ailai Tro que part Normandia, A un savai Baro tot o daria, Non cuch ni sai Que visques sen rancor! Que greu si fai Que fort grans manentia Son don apai De conquerre major. Mal li eschai Aitan grans baronia Pos non l'estrai Del nom de raubador. Mais val assas Uns ribautz ab paubrieira, Que viu en pas E suefre sa nessieira, C'us coms malvas Que tot jorn fai sobrieira D'avol percas, Que non tem dessonor. C'al ribaut plas La via drechurieira, E-l coms es las De Dieu e de sanctor. E quar lo bas Homs a valor entieira, E-l coms non pas, Pres ieu mais lo meillor. E que faran Li baron de mal aire Que tot jorn fan Lo mal e-l ben non gaire Cossi poiran Los tortz qu'an fach desfaire Que lor enfan Seran plus tolledor, E non daran En l'arma de lor paire Los pres d'un gan, Ni negus en la lor, E li engan Qu'aura fach l'enganaire Retornaran Sobre l'enganador Non ai talan D'aver aital repaire Que uei en chan E tos temps mais en plor. |