prosody | miscellaneous |
Tostemps azir falsetat et enjan Et ab vertat et ab dreg mi capdel! E si per so vauc atras o avan, No m'en rancur, car tot m'es bon e bel, Que-ls us dechai lialtatz mantas ves E-ls autres sors enjans e mala fes, Mas si tant es c'om per falsetat mon, D'aquel montar deissen pois en preon. Li croi baron an pietat tan gran De l'autra gen com ac Cayms d'Abel! E volon mais raubar que lop non fan E mais mentir que tozas de bordel. Si-ls traucavatz en dos luocs o en tres Ja no crezatz que vertatz n'issis ges, Mas mensonjas, don an al cor tal fon Que sobrevers com aiga de toron. Mains barons vei en mains luocs que estan Plus falsamens que veires en anel E qui per fis los ten faill atretan Com si un lop vendia per agnel. Car il no son ni de lei ni de pes, Anz foron fait a for de fals poges On par la cros e la flors en redon E no-i trob'om argent cant lo refon. Des Orien tro al soleil colgan Faz a la gent un covinen novel: Que al leial donarai un bezan Si-l desleials mi dona un clavel, E un marc d'aur donarai al cortes Si-l deschauzitz mi dona un tornes! Al vertadier darai d'aur un gran mon S'ai eu un uou dels mensongiers que-i son. Tota la lei que-l plus de la gent an Escriur' ieu en un petit de pel, En la meitat del polgal de mon gan, E-ls prozomes paissera d'un gastel, Car ja pe-ls pros non fora cars conres. Mas si fos oms qui los malvatz pagues, Cridar pogra, e non gardessa on: Venes manjar, li prozome del mon. Sel que no val ni ten pro per semblan, Pro ni valen no-s tainh que hom l'apel, Ni dreiturier can met dreg en soan, Ni vertadier can vertat non espel. Car qui fai mal ni tort, razos non es Qu'en cueilla grat ni lauzor ni pres ges, Anz es ben ditz un reprochiers pe-l mon: Sel qu'una ves escorja autra non ton. A totas gens dic en mon sirventes Que si vertatz e drechura e merces Non governon home en aquest mon, Ni sai ni lai non cre valors l'aon. Faidit, vai-t-en chantar lo sirventes Drech al Tornel a'n Guigo, qui que pes, Car de valor non a par en cest mon Mas mon seinhor en Eble de Clarmon. |