| |
|||
| prosody | miscellaneous |
Si tots temps vols viure valens e pros E que tots hom te tenya per valen, E guazanyar Dieu a te e la gen, Sies leyals e fis e valeros. Car hieu crey qu'a Dieu playa Home leyals e·l segles que s'en paya! E tu'n vals mays s'est leyals, ples de be, Car leyaltats en l'hom tot be rete. Sies tots temps plazens ez amoros E saluda, s'-pots, primeramen, Segons dever saludan bellamen, Honran a tots, segons que es rasos, E tal a cuy s'eschaya, C'al trop cortes dits hom qu'el parla braya. Tot trop son trop, e qui trop fay de se, Lo trops no·y tanh, e·l pauchs i descove. Ja per gran dan no seras cossiros Ne per gran be no·t tendras trop jausen. Mas vulles far tos fayts saviamen, E fay los tals que·ls tinguen tuyt per bos. Tos enamichs apaya Ab jent parlar, mas dels fayts los esglaya. Perdona tost leu fayt quan s'esdeve, E del grieu fayt ajes fera merce. No prometes si no vols far tos dos Ne no queres trops grans dons examen: Serviras be coma savi serven E despendras part poder a sasos. Fals consells te desplaya E pietat dels paubres tos cors aya. A ton amich val quant auras de que, Qu'axi'n pot fer ell, si tals cas te ve. Ves ton amich no·t mostres trop iros Si tots tos mals te blasma e·t repren, Car cell be·t vol que·t castiga soven, E a cuy play la tua faillisos Amor no t'ha veraya. Enans dels ops a ton amich asaya E gens d'amar no·t avantes dese, Si dons no·l plats avans l'amor de te. Al plasent hom no·t mostres corrocos N'al corrocos alegre ne jausen! Ne·l lausenjers no·t trobe lleu cresen Ne lo paubres trop avar ne pitos. Ne·l mals de bona paya! Ne coberts hom ton cor clar no·t sostraya, Ne savis hom no·t trob fat, ni per re Lo fats savi ne·l fals de bona fe. Humilitats te playa, Qu'en cre. . . . . . . . aya . . . . . . . . . . saubes trop de . . . . e . . . . . . . . . . s valens qu'en e. |
Metrical pattern: 577o