| |
|||
| prosody | miscellaneous |
Per far esbaudir mos uezis, Que·s fan irat quar ieu no chan, No mudarai deserenan, Qu'ieu no despley Un so nouelh, que·ls esbaudey! E chant mais per mon Tort·n'auètz, Quar trop dechai Tot quan uey sai, Mas lai ab lieys creys ioys e prètz, Per que·l sieus conortz m'es plus bos Que tot quan uey far entre nos. De midons ai lo guap e·l ris E suy fols, si plus li deman, Ans dey auer gran ioy d'aitan! A dieu m'autrey-- Non ai donc pro, quar sol la uey-- Del uezer suy ieu bautz e lètz, Plus no m'eschai, Que ben o say, Mas d'aitan n'ai ieu ioy e prètz E m'en fauc ricautz a sazos A guiza de paubr'ergulhos. De totz drutz suy ieu lo plus fis, Qu'a midons no dic re ni man Ni·l quier gen fait ni bel semblan! Cum qu'ilh m'estey, Sos drutz suy et ab lieys dompney Totz celatz e cubertz e quètz, Qu'ilh no sap lay Lo ben que·m fai, Ni cum ai per lieys ioy e prètz! Ni·s tanh que ia·l sapch' enuios, Qu'ieu suy sai sos drutz en rescos. Anc ieu ni autre no·lh o dis, Ni elha non saup mon talan, Mas a celat l'am atretan-- Fe qu'ieu li dey-- Cum s'agues fait son drut de mey! Re no·m qual, que ia l'am eis sètz-- Doncs amarai So qu'ieu non ai-- Oc, qu'eyssamen n'ay ioy e prètz E son alegres e ioyos, Quant res non es, cum si uers fos. Per s'amor uiu, e se·n moris, Qu'om disses qu'ieu fos mortz aman, Fait m'agr'amors honor tan gran, Qu'ieu say e crey Qu'anc a nulh drut maior non fey! Vos jutgatz, dompna, e destrenhètz Car s'ieu m'esmay E si mal tray Ni muer per uos, ioys m'es e prètz: De uos m'es totz mals bes, dans pros, Foldatz sens, tortz dregz e razos. Ieu mai que mai Ma donn' ieu sai Que uos mi donatz ioy e prètz! E uuelh mais morir ad estros Ia·l sapcha negus hom mas uos. Bastart, tu uay E porta·m lay Mon sonet a mon Tort·n'auètz! E di·m a n'Aimeric lo tos Membre·lh dont es e sia pros. |
Metrical pattern: 731c