| |
|||
| prosody | miscellaneous |
Tant ai mon cor en ioy assis, Per que no puesc mudar no·n chan, Que ioys m'a noirit pauc e gran! E ses luy non seria res, Qu'assatz uey que tot l'als qu'om fay Abaiss' e sordey' e dechai, Mas so qu'amors e ioys soste. Lo segles es aissi deuis Que perdut es quant l'auol fan, Mas ab los pros uay pretz enan! Et amors ten se ab los cortes, E d'aqui son drut cuend' e guay, Perque·s te ioys que tost non chai, Qu'estiers d'els mais hom no·l mante. Si·l ioys d'amor no fos tan fis, Ia non agra durat aitan, Mas no y a d'ira tan ni quan, Que·l dans n'es pros e·l mals n'es bes E soiorns, qui plus mal en tray! Demandatz cum qu'ie·us o diray: Quar apres n'aten hom merce. Pauc pren d'amor qui no sofris L'erguelh e·l mal e·l tort e·l dan, Qu'aissi o fan silh que re n'an! Guerra·m sembla, qu'amors non ges, Quan son li mal e sai e lai, E non ai dreg e·l fieu qu'ieu ay, S'al senhor don mou, mals en ue. Amors ditz uer et escarnis, E dona pauza e gran afan E franc cor apres mal talan! Huey fai que platz, deman que pes.-- E doncx que·n diretz qu'aissi uay-- Que costa que tot torn' en iay, Pueys apres no y a re mas be. Membra·m aras d'un mot qu'ieu dis.-- E qual--non uuelh qu'om lo·m deman.-- No l'auzirem doncx--non onguan! No·us er digz ni sabretz quals es.-- No m'en qal, qu'atressi·m uiuray.-- Si·us uiuetz o·us moretz, so say, No costa re midons ni me. Mon Tort·n'auetz en Narbones Man salutz, si tot luenh s'estai, E sapcha qu'em-breu la ueyray, Si trop grans afars no·m rete. Lo senher, que fetz tot quant es, Salu e guart son cors cumsi·s fay, Qu'ilh mante pretz e ioy ueray, Quan tot' autra gens s'en recre. |
Metrical pattern: 747c