| |
|||
| prosody | miscellaneous |
Baron, Jhesus, qu'en crotz fon mes Per salvar crestiana gen, Nos mand'a totz comunalmen Qu'anem cobrar lo saint paes, On venc per nostr'amor morir. E si no.l volem obezir, Lai on feniran tuit li plag, N'auzirem maint esquiu retrag. Que.l saint Paradis que.ns promes, On non a pena ni tormen, Vol ara liurar francamen A sels qu'iran ab lo marques Outra la mar per Dieu servir! E cill qui no.l volran seguir, Non i aura negun, brun ni bag, Que no.n puesc'aver gran esglag. E veiatz del segle quals es, Que qui.l sec plus, al pieitz s'en pren! Pero non i a mas un bon sen: Qu'om lais los mals e prenda.ls bes. Que pus la mortz vol assalhir, Negus non pot ni sap gandir. Doncs pus tuit morem atrazag, Ben es fols qui viu mal ni lag. Tot lo segle vei sobrepres D'enjan e de galiamen! E son ja tan li mescrezen C'apenas renha dreigz ni fes, Que quasqus ponha en trair Son amic per si enrequir. Pero.lh trachor son aissi trag Cum selh qui beu tueissec ab lag. Catalan et Aragones An senhor honrat e valen E larc e franc e conoissen, Humil et adreg e cortes. Mas trop laissa enmanentir Sos sers, cui Dieus bais et azir! Qu'a totz jorns estan en agag Per far en cort dan et empag. Reis aunitz val meins que pages, Quan viu a lei de recrezen E plora.ls bes qu'autre despen E pert so que.l paire conques. Aitals reis fari'ad aucir Et en lach luec a sebelhir, Qui.s defen a lei de contrag E no pren ni dona gamag. Domnas vielhas non am ieu ges, Quan vivon descauzidamen Contr'Amor e contra Joven! Quar fin paratg'an si mal mes, Fer es de comtar e de dir E fer d'escotar e d'auzir! Quar franc domnei an si tot frag Qu'entre lor no.n trob'om escag. Dona, si.m tenetz en defes Que d'al re non ai pessamen Mas de far vostre mandamen. E s'en grat servir vos pogues Entre.l despulhar e.l vestir, Ja mais mals no.m pogra venir! Quar vostre dig e vostre fag M'an sabor de roza de mag. Reis de Leon, senes mentir, Devetz honrat pretz reculhir, Cum selh qui semen'en garag Temprat d'umor ab douz complag. |