prosody | miscellaneous |
Dieus en sia grazitz Que.l francs reis es gueritz E sas e deleichos! Per qu'ieu cobre chansos Gaias et ab gais sos, De que m'era giquitz Corrossos e marritz! Mas la sua salutz Nos a totz ereubutz, E tornat en joven Mon cor e mon talen. Quar de bona razitz Es bos arbres issitz, E.l frugz es cars e bos E dous e saboros! Et ieu torn amoros Vas domnas e chauzitz Tan qu'enuei' als maritz, De cui sui plus temsutz Que fuecs ni fers agutz Quar don me vuelh m'en pren, C'us no las mi defen. Ben tanh qu'ieu si'arditz, Que tals domna m'es guitz, Qu'es la genser qu'anc fos! Qu'ab sas bellas faissos Siei bell huelh orgoillos An mains cors envazitz. Per que mos esperitz Es ab lieis remazutz: Don mi sen revengutz De tot lo marrimen, Qu'ai soffert lonjamen. Jovens es mal bailitz E pretz tenc per traitz Per colpa dels baros: Quar vezem los garsos Manens et orgulhos E.ls cortes escarnitz. E domnas trichairitz On totz bes es perdutz, Renhan contra nos drutz Trop deschauzidamen Ab doble falhimen. Ai bels cors gent bastitz, De totz bos aips complitz, Don', aissi.m rent a vos, Humils e voluntos E destreitz e cochos Si cum selh qu'es feritz D'amor el cor, que.m ditz, Que.m rend'a vos vencutz! Doncs si no.m faitz aiutz, Mort auretz chauzimen, E no.us estara gen. Per flac rei apostitz Es bos regnes delitz, Quan planh sas messios E plora.ls autruis dos E fug solatz dels pros! E reis, pus viu aunitz, Val meins que sebelhitz. Mas ieu sui car tengutz Dels melhors e crezutz Per la corteza gen Quar contr'Amor no men. Per so.m sui gent garnitz Contra.ls flacs acrupitz, Qu'ab mi n'es Aragos E Castell'e Leos, E.l valens reis N'Amfos Te.ls castels establitz, On pretz es gen servitz Et honratz e volgutz! Per qu'ieu dels abatutz Flacs avars, cor de ven, Ai pauc de pessamen. Qu'aissi cum es arditz Leos plus que cabritz Et ors que buous cornutz E lops que bocs barbutz, Ai ieu mais d'ardimen, Que tuit li recrezen. E qui mos dic agutz Encontra si enten, Eu li don francamen. |