| prosody | miscellaneous |
Mos cors s'alegr'e s'esjau Per lo gentil temps suau E pel castel de Fanjau Que·m resembla paradis! Qu'amors e jois s'i enclau E tot quant a pretz abau E domneis verais e fis. Non ai enemic tan brau, Si las domnas mi mentau Ni m'en ditz honor ni lau, Qu'ieu no·lh sia bos amis. Et quar mest lor non estau, Ni en autra terra vau, Plang e sospir e languis. Mos Bells Arquiers de Laurac, De cui m'abelis e·m pac, M'a nafrat de part Galhac E son cairel el cor mis! Et anc mais colps tan no·m plac, Qu'ieu sojorne a Saissac Ab fraires et ab cozis. Per tostemps lais Albeges E remanh en Carcasses, Que·lh cavalier son cortes E las domnas del pais, Pos la Lob'a·m si conques, Que si m'ajut Dieus ni fes, Al cor m'estan siei dous ris. A Dieu coman Monrial E·l palaitz emperial, Qu'ieu m'en torn sai a'N Barral, A cui bons pretz es aclis! E cobrar m'an Proensal, Quar nulha genz tan no·m val, Per que serai lor vezis. |
Metrical pattern: 51b