| prosody | miscellaneous |
Per mielhs sofrir lo maltrait e l'afan Que.m don'Amors, don ieu no.m puesc defendre, Farai chanso tal qu'er leus per apendre, De motz cortes et ab avinen chan. E fas esfors, quar n'ai cor ni talan De far chanso! qu'ades planh e sospire, Quar no vei lei, don mos cors non s'ahire, Quar tant m'es luenh la terr'e.l dous pais On es selha vas cui ieu sui aclis, Per qu'ai perdut joi e solatz e rire. A lieis m'autrei ab ferm cor ses enjan, Quar totz sui sieus ses donar e ses vendre! E vuelh trop mais em bon esper atendre Lieis cui soplei, don jois me vai tardan, Que d'autr'aver bel fait e bel semblan! Qu'inz e mon cor m'a fait Amors escrire Sa gran beutat, don res non es a dire, E son gent cors ben fait e ben assis! Per qu'ieu li sui hom francs, fizels e fis, E per s'amor a las autras servire. Dieus, quan veirai lo jorn ni.l mes ni l'an, Qu'elha.m vuelha del mal gazardon rendre Qu'ieu non l'aus dir, mielhs m'auzaria pendre, Mon coratge, quant ieu li sui denan. Mas assatz pot conoisser mon talan, Qu'ilh es la res el mon qu'ieu plus dezire. E per s'amor suefri tan greu martire, Que la dolors m'a ja del tot conquis E.l deziriers que m'aura tost aucis: Et a.n gran tort, mas ieu no.lh o aus dire. E si merces ab lieis mi valgues tan Qu'ela.m volgues lo sieu bell bratz estendre, Ja del tirar no.m feira escoissendre De tost venir humilmen merceyan Vas lieis que m'a trastot en son coman, Que.m pot donar joi o del tot aucire, Que non ai ges poder qu'alhors me vire! E si.l plagues que pres de si m'aizis, Be.m tenc per sieu, mas mielhs m'agra conquis, E feira.m ric e de gran joi jauzire. Al pro Marques, qu'a pretz e valor gran Manten e sap gen donar e despendre, E sos rics pretz fai los autres dissendre, Vas Monferrat, chansoneta, te man: Que.l sieu ric fait son dels autres trian E per melhor lo pot hom ben eslire, Qu'el es la flors de totz, a cui que tire, E de totz bes comensamens e fis. E s'aissi fos cum ieu vuelh ni devis, Corona d'aur li vir'el cap assire. |