| |
|||
| prosody | miscellaneous |
Ab l'alen tir vas me l'aire Qu'ieu sen venir de Proensa! Tot quant es de lai m'agensa, Si que, quan n'aug ben retraire, Ieu m'o escout en rizen E.n deman per un mot cen: Tan m'es bel quan n'aug ben dire. Qu'om no sap tan dous repaire Cum de Rozer tro c'a Vensa, Si cum clau mars e Durensa, Ni on tant fins jois s'esclaire. Per qu'entre la franca gen Ai laissat mon cor jauzen Ab lieis que fa.ls iratz rire. Qu'om no pot lo jorn mal traire Qu'aja de lieis sovinensa, Qu'en liei nais jois e comensa. E qui qu'en sia lauzaire, De ben qu'en diga, no.i men! Que.l mielher es ses conten E.l genser qu'el mon se mire. E s'ieu sai ren dir ni faire, Ilh n'aia.l grat, que sciensa M'a donat e conoissensa, Per qu'ieu sui gais e chantaire. E tot quan fauc d'avinen Ai del sieu bell cors plazen, Neis quan de bon cor consire. |