| prosody | miscellaneous |
La lauzet'e·l rossinhol Am mais que nulh autr'auzell, Que pel joi del temps novell Comenson premier lur chan: Et ieu ad aquel semblan, Quan li autre trobador Estan mut, ieu chant d'amor De ma dona Na Vierna. E quar per sa merce·m col, Qu'en chantan dona l'apell, Be·s tanh qu'ap lieis mi capdell, Qu'ieu vos pliu ses tot enjan Que seus serai derenan! Quar m'a fait tanta d'onor Que·m rete per servidor Per tostemps mais Na Vierna. Las qu'eras planh so que·m dol Plus que nafra de cairell No fera ni de cotell! Per qu'es fols qui·s vai vanan Son joi tro qu'om lo·i deman, E dona fai gran follor, Que s'enten en gran ricor — E Dieus gart ne Na Vierna. Ara·m va miels que no sol: Cant ieu remir mon anell, No vei ciutat ni castell Tug non fasson mon coman! E li rei e l'amiran Me tenon tug per segnior Pel gaug e per la douzor Que·m ven davas Na Vierna. |
Metrical pattern: 714