| |
|||
| prosody | miscellaneous |
Una chanso ai faita mortamen Si qu'ieu meteis no sai dire cossi. Qu'anc nueg ni jorn, de ser ni de mati, Non tinc mon cor ni nulh mon pessamen! Mas cum era, l'autrier, mot en balansa, Pres me d'amor aitan grans benenansa, Que comensiei a chanso far dese De ma dona de cui tan me sove. Doncs per que.m te mi dons en tal turmen Qu'anc nulha res mais tan no m'abelli, Ni anc mos cors des l'ora que la vi No.n puec partir ni m'amor ni mo sen. E si.m fai mal, ilh fai mot gran erransa! Mas si.m fezes amistat e piatansa, No pogra far el mon maior merce, Pueis a.n razo, quar s'amors me soste. Mas ges no.m par qu'ill n'aja bon talen, E non per tan, quan me parla, e.m ri E promet me! mais anc mais no menti Nulha dona tan azaut ni tan gen. Pero.l bels ditz me torn'en alegransa, E si.m disses vertat, ab tota Fransa Non estera ta suau ni tan be! Mas non a cor ni voluntat en re. Anc non amet nuls hom tan folamen, Neis l'escudiers qu'a la taula muri! Atressi.m muer, mas plus d'a pas m'auci Lieis que o sap far cortezamen. Quar ges no.m fer de coutel ni de lansa, Mas ab bels ditz et ab plazen semblansa: Ve.us las armas ab que.m combat ancse, Depus la vi et enquer si m'o te. Pueis s'a beutat que.l det enteiramen Nostre Senher, qu'anc re no li.n parti, E gaug entier e sen verai e fi, Tot so m'ave, quar s'amor no.m cossen. Pero de mar tra hom senes duptansa Aigua doussa, per qu'ieu ai esperansa, Que sens e genhs e quar no m'en recre M'en traira joi, qu'en als no m'en refre. Sivals, dona, si.us membres del manen Que laisset Lazer morir denan si, Quals fo.l meritz que apres lo.n segui, Pueis de ben leu preiratz esgardamen Cum traissessetz de ma greu malanansa, Qu'estiers no puesc ges aver benenansa, Ni ja no.us agr'ieu, domna, ni Dieus me, S'ap tot lo mon ses vos avia be. |