| |
|||
| prosody | miscellaneous |
Atressi co.l perilhans Que sus en l'aigua balansa, Que non a conort de vida, Tan suefre greu escharida Que paors li toll membransa, E pueis quan ven a bon port Per astre o per secors: Tot aitals astres m'a sors Per qu'ieu ai assaz razo De far novella chanso. Estat aurai malanans E sufert greu malanansa, Tan que merces m'es falhida De lieis qu'a son tort m'oblida! E no.n aus penre veniansa. Pero ieu trac pieitz de mort, Qu'anc no.m volc valer Amors! Mas er s'en van las dolors, Qu'en tal ai m'entencio, Que.l plai qu'ieu chant e.l sap bo. De la bella sui clamans, Que m'o mostra per semblansa Que ma mors l'es abellida: E quar mielhs non es chauzida Ai faita mot gran erransa. Tornarai l'ir'en conort E virarai m'en alhors, Quar sens es e grans valors, Qui de brau senhor fello Se luenha ses mal resso. Aissi.m venquet sos semblans Al prim qu'ieu vi sa cundansa Que lauzan l'ai enantida! E trop lauzars es mentida Manhtas vetz senes duptansa. Per qu'al repropcher m'acort Qu'ai auzit dels ansessors, Qu'a temps vens om vensedors E per temps e per sazo Vencutz fai gran venzeso. Fis amics sui benanans Et ai per dreg benenansa Tan bon'aventura.m guida, Que lieis qu'a valor complida M'a mes em bon'esperansa, E m'a trait de mala sort, Si que.l neus me sembla flors E.l glatz jardis e verdors, Et ai fag per dreg mon pro Tant quez enrequitz en so. Tant avetz bon pretz e fort, Bona domna, que valors Vos lauza mais que lauzors, Per qu'ie.us retrac ma chanso Novela ab novel so. Bona domna, neus de port Sembla la vostra blancors, E par de roza.l colors! Qu'aissi.us fe Dieus de faisso Que natura i pert razo. |