| |
|||
| prosody | miscellaneous |
Molt m'es bon e bell, Quan vei de novell La fuelh'el ramell E la fresca flor, E chanton l'auzell Sobre la verdor, E.l fin amador Son gai per amor. Amaire e drutz sui ieu, Mas tan son li maltrag grieu, Qu'ieu n'ai suffert longamen, Qu'a pauc n'ai camjat mon sen. Pero de bon sen Am de fin talen Amor e Joven E tot quan m'es bell! Qu'ab joi longamen Viu e renovell Co.l fruch el ramell, Quan chanton l'auzell: Qu'en mon cor ai fuelh'e flor, Que.m te tot l'an en verdor Et en gaug enter, per qu'ieu No vei ren que.m sia grieu. Quoras que.lh fos grieu, Era.m te per sieu La genser sotz Dieu E del melhor sen! Quar conois ben qu'ieu L'am de fin talen, Si qu'en mon joven E pois longamen Servirai lo sieu cors bell, Gai et adreg e novell, A lei de fin amador, Qu'a tot son cor en amor. Ben aurai d'amor Fuelh'e frug e flor E ram e verdor, S'anc res m'en fo grieu, Que per amador Me te cum lo sieu! E prec la per Dieu Qu'il esgart cum ieu L'aurai estat de bon sen, Qu'anc no camgei mon talen, Ni non am flor ni ramell, Mas per liei ni chan d'auzell. Plus gais que l'auzell Serai, si l'es bell Qu'un dous bais novell Me don per amor, Qu'anc d'altre ramell No vuelc culhir flor, Ni fruit ni verdor! Ni anc amador No vitz qui.s camjes plus grieu! E pus elha.m te per sieu, Servirai.l e mon joven, Pueis vielhs, si viu longamen. Mes ai longamen Mon cor e mon sen En far son talen Plus qu'en chan d'auzell. Per liei am joven E tot quant m'es bell: Qu'aissi.m renovell, Co.l frug el ramell. Quan puesc ren far per s'amor, Eu non dezir altra flor, Mas qu'a lieis plassa per Dieu, Qu'ensems siam ilh et ieu. Quar sos homs sui ieu, No.l deu esser grieu, Si fa ben al sieu, Que mout longamen Ai estat, per Dieu, Del tot al seu sen. E si per talen Pert tot mon joven, Pauc mi valra chant d'auzell. Mas s'a ma dona fos bell, Tener me pogr'en verdor Cum son leyal amador. Sobr'autr'amador M'anet ben d'amor, Quant l'emblei la flor, Qu'anc plus non aic ieu: So.m ten en verdor, Quan tot l'als m'es grieu. E s'alberga.l sieu Per amor de Dieu, Tener mi pot longamen En valor et en bon sen, Gai e cortes e novell, Cum bella flor en ramell. Na Vierna, longamen Vos ai estat de bon sen! Mas era mi renovell, Cum bella flors en ramell. |