| prosody | miscellaneous |
Ajostar e lassar Sai tan gent motz e so, Que del car ric trobar No.m ven hom al talo, Quant n'ai bona razo. Mas auci me aissi La bella de cui so, Cum s'ieu fes mespreizo Vas lieis o tracio. Quant la vi si.m feri Mon coratge gloto, Qu'ades poinh el sieu pro, E no.m fai si mal no. Mal mi vol e no sai per que, Mas sol quar am lieis mais que me. Assatz par que lonhar Me volc de sa reio, Quan passar mi fes mar, Per qu'ieu la.n ochaizo. Mas no.i ai sospeisso, Qu'ieu.l servi ab cor fi, Tan quan puec a bando, E no.n aic guizardo, Mas sol d'un pauc cordo. Si agui, qu'un mati Intrei dins sa maizo E.lh baiziei a lairo La boca e.l mento. So n'ai agut e no mais re E sui totz mortz, si.l plus rete. Sospirar e plorar Mi fai manta sazo, Qu'alegrar e chantar Volgra mais, si.l fos bo! Mas cor a de drago, Qu'a me di mal e ri Als autres deviro, E.m fai huelhs de leo: Per aital faillizo Fes de mi pelegri, Qu'anc romieus d'orazo Mais ta forsatz no fo. E qui.l ver en despo, Totz hom deu percassar son be, Ans que mals seinhers lo malme. Abrazar e cremar Mi fai cum fuecs carbo. Quan l'esgar, tan vei clar Sos heulhs e sa faisso, Que non sai guerizo, Si.m cambi ni.m desvi D'amar liei. hai baro Co.m te en sa preizo Amors, que Salamo, E Davi atressi Venquet e.l fort Samso, E.ls tenc en son grillo, Qu'anc non ac rezemso Tro a la mort! e pus mi te, Ad estar m'er a sa merce. Esperar e muzar Mi fai coma Breto, Qu'anc l'amar ni l'honrar No.lh mis en contenso. Ans, si Dieus mi perdo, M'en parti de tal qui M'agra dat tan ric do, Que.l bos reis d'Arago For' honratz! e doncs co Me faidi qu'ie.us afi, Quan n'aug dir bon resso, Gaugz entiers mi somo Qu'en deia far chanso. E doncs pus tan l'am e la cre, Ja no.i dei trobar mala fe. Pus pauzar ni finar No puesc nulha sazo, Retornar et anar M'en vuelh ad espero Entr'Arle e Tolo A tapi, quar aqui Am mais un pauc cambo, Qu'aver sai Lo Daro, Ni aver Lo Toro N'Ibeli: mas frairi Fals lauzengier gloto M'an moguda tenso E lunhat del Peiro, E'N Drogomans no m'au ni.m ve, Quar mon car Amic part de se. A mon amic Folco Tramet lai ma chanso Que la chant en bon loc per me, Al tenen on joi vai e ve. Mal astre Dieus li do, Qui.l comte d'Avinho Mesclet tan malament ab me, Per que Na Vierna no.m ve. Mas a Tripol m'ado, Que quan l'autre baro Caco prez, et el lo rete E no.l laissa partir de se. |