| prosody | miscellaneous |
Son ben apoderatz Per Amor e vencutz, Car aital via tenc Qe lai, on ieu plus prenc D'ancta ni d'encombrier, Torni plus volontier, Per q'ieu sai q'es vertatz Q'el es mager assatz Gaugz, cant es car compratz, C'aicel don es viutatz. Enqier sui plus iratz Dels cordons c'ai perdutz, Qe d'aisso qe m'avenc! E pero ges no.m fenc, Anz sui plus vertadier Qi no m'agra mestier, Q'enqer par als costatz Con ieu fui laig menatz! E puis m'es tot deintatz, Pois c'a ma dona platz. Don pueis mos Castiatz Aunis ni rauba drutz, No.il pes s'ieu l'en reprenc, Car qi fa qe blastenc Auzir deu repropchier! E car per pauc denier Fui en sa cort raubatz, Lo blasmes l'es restatz, E fora plus honratz S'el fos d'el revenjatz. Cel n'es plus enjanatz Qi l'es d'amor tengutz: Q'el segnier de Berenc, Sai ben com l'esdevenc! E pueis lo Pognautier, Car guerreiet premier Fon per el desrocatz! E i a totz temps guidatz Sos bos amics privatz Si con escaravatz. Per zo n'es sos comtatz Enrechitz e cregutz! Mas meins val d'un arenc Zo qe per forsa tenc. Q'el pres monge claustier, A cui tolc lo mostier! Pero si n'a raubatz Sain Felitz e Mornatz, Mas Tripol, so sapchatz, Fo gen d'el conqistatz. E.l portal e.ls fossatz De Fonchaud'a fondutz! E pueis tan m'en sovenc, Qe de plus no m'estenc, Qez a Ne Forchalcier Enemic e gerrier, Si qe mos Gazaignhatz Ten Opida em patz! E si es perdonatz, Si n'a tort lo pechatz. Domna, vostra beutatz E.l finz pretz mentaubutz Mi fai semblar sabenc Tot autre joi c'anc venc! De vos en alegrier M'estauc ab cor entier, Don n'ai major solatz. Ai don', humilitatz E pretz e pietatz Vos met'entre mos bratz. Na Vierna, proatz Vilas mal enseignatz Es qi nos a loignatz De nostras amistatz. Per qe, mos Chastiatz S'es per Roma crematz, Si.lh fai, mas es pechatz, Pos totz no.i es taratz. |