prosody | miscellaneous |
Ges pel temps fer e brau, Qu'adutz tempiers e vens, Don torba.ls elemens E fa.l cel brun e blau, No.s camja mos talens, Ans es mos pessamens En joi et en chantar, E.m vuelh mais alegrar, Quan vei la neu sus en l'auta montanha, Que quan las flors s'espandon per la planha. Amors e jois m'enclau Et amezura.m sens, E beutatz e jovens M'alegra e m'esjau, E francs cors gais e gens M'es de totz mals guirens. Bel ris e dous esgar Me fan rir'e jogar, Cortes solatz mi reten e.m gazanha E gaugz entiers me toll trebalh e lanha. Dona, de vos mi lau, Quar etz douss'e plazens E la plus avinens Que negus hom mentau: Que.l vostr'essenhamens Vos fai als conoissens Bendir e tener car Et a me tant amar, Que.l cors e.l sens me ditz qu'ap vos remanha, E si.m faitz mal, qu'ad autra no m'en planha. De lai on venc ni vau, Sui vostres bendizens E sers obediens, Cum sel qu'ap vos estau, Per far vostres talens! E ja.l francs chauzimens No.m deu oimais tarzar So que.m fai esperar: Despos Artus an cobrat en Bretanha, Non es razos que mais jois mi sofranha. Quar qui vos ve ni au Non pot esser dolens Per negus marrimens. Ai domna, tan suau M'apodera e.m vens Vostra cara rizens, Que, quan vos aug parlar, No.n puesc mos huelhs virar. Tan m'abellis vostra doussa companha Que d'autra m'es salvaga et estranha. De lai on creisso.l fau Mi ven us jauzimens, Dont sui gais e jauzens, Qu'onra.l nom de Peitau! E ja.l fals recrezens, Cobes mal despendens No.m poira conquistar Per soven penchenar. Sitot si penh ni.s mira ni s'aplanha, Tot son afar non pretz una castanha. Que.l cor a flac e cau Et es menhs que niens! Que de mil sagramens No.l creiri'hom d'un clau. E dolon m'en las dens, Can parli d'aitals gens! Per qu'ieu m'o lais estar D'En Sauc, filh d'Albar, On malvestatz se sojorna e.s banha, E sos pretz es aitals cum fils d'aranha. Al Rei valen e car Vuelh en mo vers mandar Que, si sai pert Proensa, pauc gazanha Pel bel sojorn que pren lai en Espanha. Fraire, rir'e jogar Suelh per vos e chantar, Mas er es dregz que sospir e que planha, Quar vostr'amors m'es salvag'ez estranha. Bels Sembelis, per vos am mais Serdanha. |