prosody | miscellaneous |
Ben viu a gran dolor Qui pert son bon senhor, Qu'ieu perdiei lo meilor Qu'anc mortz pogues aucir. E quar no puesc murir Ni es dreitz qu'om s'aucia, Per ma vida gandir, M'en anei en Ongria Al bon rei N'Aimeric, On trobei bon abric, Et aura.m ses cor tric Servidor et amic. Et aura.i gran honor Si m'a per servidor, Qu'ieu puesc far sa lauzor Per tot lo mon auzir, E son pretz enantir Mais d'autr'om qu'el mon sia. E quar mi saup cauzir Ni m'ac bella paria, Menhs en pretz manh croi ric Manent ab cor mendic: E diran tuich qu'ieu dic Del filh de Lodoic. Pauc pres emperador Escas ni raubador Ni rei galiador, Que vol Dieu escarnir Ne sos baros aunir Per falsa maistria. Mas al derrier sospir Ja no.il valra feunia Plus que fes dan Anric, Qan camjav'en enic E.l bon Richart aucic E Dieu que n'envazic. Reis no ama valor, Qui vol creire trachor Ni ser galiador Escoutar ni auzir! Quar ser fan joi delir E baisson cortezia E poinhan en trair Lor senhor quascun dia: Qu'Alixandres moric Per son ser que.l traic, E.l rei Daire feric De mort sel qu'el noiric. Per qu'eu no vuelh ricor Mas de gaug e d'amor, Quar ben tenc a follor Qui trop vol enriquir So don no pot jauzir. Qu'ieu no vuelh manentia Don tota gens m'ahir Ni.m diga vilania! Mais am lieis que.m traic Cel'ora qu'eu la vic, E pos tan m'abellic, Mos cors no s'en partic. Que roza de pascor Sembla de sa color E lis de sa blancor! E quant la volc bastir, Dieus i mes son albir, Qu'en ren als non l'avia, E'n lieis volc revenir Amor e drudairia! Qu'us esgartz mi feric, Don anc pois no.m garic! Mas guerra.m, quan que tric, O joven o antic. Chanson, vai t'en part Vic Al gran de bon espic E di li que no.s tric De far tot lo mon ric. Chanssos, vai dir qu'ieu dic Al rei Peire part Vic, Que ben par a l'espic Cals fo.l grans don issic. Alaman, trop vos dic Vilan, croi et enic, Qu'anc de vos no.s jauzic Qui.us amet ni.us servic. |