prosody | miscellaneous |
Nulhs hom non pot d'amor gandir, Pos qu'el sieu senhoriu s'es mes: O tot li plass'o tot li pes, Sos talens l'aven a seguir. E sapchatz qu'om enamoratz Non pot segr'autras voluntatz, Mas lai on vol Amors lai cor E no.i garda sen ni follor. Adoncs saubi pauc d'escrimir, Ni no.m gardei tro qu'eu fui pres Co.l fols auzels, quant au lo bres, Qui.s vai cochozamen aucir. Et ieu cochos mis m'en tal latz, Don era.m tenh per enganatz! Qu'en poder sui de tal seinhor, Que no.m vol far ben ni honor. Ni re no degr'om miels fugir Com mal senhoriu, qui pogues. Mas fugir no li puesc ieu ges, Qu'outra la mar m'anet ferir Amors daus lo senestre latz Tal colp per qu'ieu sui sai tornatz! Don morrai d'ir'e de dolor, Si gaugz entiers no m'en socor. Et ab gaug me pogra guerir D'ira ma dona, s'ilh volgues! E per ma fe, s'a leis plagues, No.il degra ma mortz abellir, Que totz sui sieus endomenjatz. E non o dic ges, so sapchatz, Per so que.m fassa mortz paor, Mas quar ilh pert son amador. Ben degra ma domna chauzir Cum sui tornatz en sas merces! Quar per razon val bona fes, On falh lo poders de servir. Qu'en las ricas cortz pietatz Desencolpa.ls plus encolpatz! Per qu'umilitatz ab ricor Don'a totz autres jois sabor. D'autre mal me pogra garir, Mas d'aquest me trenchet lo fres, Quan ma bella dona.m promes So don m'ac en cor a mentir. E servirs mal gazardonatz, Acel que.l pren, es grans pechatz, Que per mal gazardonador Son paubre manh bo servidor. Dona, pos no m'en puesc sofrir, Dieus e chauzimens mi valgues, Que.m vengues de vos qualsques bes, Que non ai poder qu'als dezir. Si.m destrenh vostra grans beutatz, Qu'envazitz m'a.ls huelhs e passatz, Si qu'al test n'ai la resplandor, Que.m toll lo sen e la vigor. Senher coms de Peitieus, be.m platz, Quar es en l'ausor gra montatz, Que gen vos vei cobrar l'onor Que perderon vostr'ancessor. Sitot s'es mals mos Chastiatz, Dolors m'en pren e pietatz, Quar es vielhs e pren deshonor E.m toll Na Viern'e s'amor. |