prosody | miscellaneous |
S'ieu fos en cort on hom tengues dreitura, De ma dona, sitot s'es bon'e bella, Me clamera, qu'a tan gran tort me mena Que no m'atent plevi ni covinensa. E doncs per que.m promet so que no.m dona, No tem pechat ni sap que s'es vergonha. E valgra.m mais que.m fos al prim esquiva, Que que.m tengues en aitan greu rancura! Mas ilh o fai si cum selh que sembella, Qu'ab bel semblan m'a mes en mortal pena, Don ja ses liei non puesc aver guirensa! Qu'anc mala fos tan bella ni tan bona D'autres afars es cortez'e chauzida, Mas mal o fai, car en mos dans s'abriva, Que peitz me fai, e ges no s'en melhura Que mals de dens, quan dol en la maissella! Qu'al cor me bat e.m fier, que no.s refrena, S'amors ab lieis et ab tota Proensa. Que quant no vei mon Rainier de Marcelha, Sitot me viu, mos viures no m'es vida! E malautes que soven recaliva Gueris mot greu, ans mor, quan sos mals dura. Doncs sui ieu mortz, s'enaissi.m renovella Aquest dezirs que.m toll soven l'alena. A mon semblan molt l'aurai tart conquista Quar nulha dona peitz no s'acosselha Vas son amic, et on plus l'ai servida De mon poder, ieu la trop plus umbriva. Doncs quar tan l'am, molt sui plus follatura Que.l fols pastre qu'al bel Pueg caramella. Mas vencutz es cui Amors apodera! Apoderatz fui quan ma don'aic vista, Quar negun'autr'ab lieis no s'aparelha De gaug entier ab proeza complida. Per qu'ieu sui sieus e serai tan quan viva, E si no.m vol, er tortz e desmezura. Chanson, vai t'en a la valen reina En Aragon, quar mais reina vera Non sai el mon, e si n'ai manhta quista, E no trop mais ses tort e ses querelha. Mas ilh es franc'e lials e grazida Per tota gen et a Dieu agradiva. E quar lo reis sobr'autres reis s'enansa Ad aital rei cove aitals reina. Bel Castiat, vostre pretz senhoreja Sobre totz pretz, qu'ab melhors faitz s'enansa. Mon Gazanhat sal Dieus e Na Vierna, Car hom tan gen non dona ni guerreja. |