| |
|||
| prosody | miscellaneous |
Quant hom es en autrui poder, Non pot totz sos talens complir, Ans l'ave soven a gequir Per l'autrui grat lo sieu voler. Doncs pos em poder mi sui mes D'Amor, segrai los mals e.ls bes E.ls tortz e.ls dreitz e.ls dans e.ls pros, Qu'aissi m'o comanda razos. Car qui vol al segle plazer, Mantas vetz l'aven a sufrir So que.lh desplatz ab gen cubrir, Ab semblansa de nonchaler! E pueis, quant ve que sos luecs es, Contra sel que l'aura mespres No sia flacs ni nualhos, Qu'en gran dreg notz pauc d'uchaizos. Tant ai de sen e de saber, Que de tot sai mo mielhs chauzir, E sai conoisser e grazir Qui.m sap honrar ni car tener. E tenc m'a l'us dels Genoes, Qu'am bel semblan gai e cortes Son a lor amics amoros Et a.ls enemics orgulhos. Pretz e Joven vuelh mantener E bonas donas obezir Et a corteza gen servir! E non ai gran cura d'aver. E pero, s'ieu poder agues, Non es coms ni ducs ni marques, A cui meilhs plagues messios Ni meins se pac d'avols baros. Cel qui pot e no vol valer, Com no s'esforsa de murir, Dieu, quar la mortz no.l denh'aucir, Per far enueg e desplaser Et es trop lag, d'onrat pages Quan recuelh las rendas e.ls ces: Cor poirit ab cors vermenos, Viu ses grat de Dieu e de nos Bona dona, Dieu cug vezer, Quan lo vostre gen cors remir: E quar tan vos am e.us dezir, Grans bes m'en deuri'eschazer. Qu'aissi m'a vostr'amors conques E vencut e lassat e pres, Qu'ap tot lo segle, que mieus fos, Mi tenri'eu paubres ses vos. Dona, quan vos vi remaner E m'avenc de vos a partir, Tan m'angoisseron li sospir, Qu'a pauc no m'avenc a cazer. Ai bella dona, franca res Valha.m ab vos Deus e Merces Retenetz mi e mas chansos, Sitot pez'al cortes gilos. Dona, per vos am Narbones E Molinatz e Savartes, Castella e.l bon rei N'Amfos, De cui sui cavaliers per vos. Hondraz reis e francs e cortes, D'En Durfort vos prec, e no.us pes, Q'entre.ls vostres ondraz baros Lo retenguaz, qar es razos. Emperaire dels Genoes Remanh et ai tal feu conques, Qu'es avinens e bels e bos, E sui amics dels borbonos. |