| |
|||
| prosody | miscellaneous |
Emperador avem de tal manera, Que non a sen ni saber ni membranza: Plus ibriacs no s'asec en chadera Ni plus volpills no porta escut ni lanza, Ne plus avols non chaucet esperos Ni plus malvaz no fez vers ni chansos: Rens non es meins, mas que peiras non lanza. Espaza voill qe sus pel cap lo fera E darz d'acer voill qe·ill pertus la panza E brocas voill qe·il tragan la lumera! Pois li darem del vi, en luoc d'onranza Un viell capel d'escarlat ses cordos E sa lanza sera uns loncs bastos! Pois poira anar segurs d'aqui en Franza. Lanza marqes, paubresa e nescera Vos coichan fort, dolors e malananza, Et es con l'orbs qe piss'en la carrera, Quant a perdut vergoingna e membranza! Plus sovent venz chastels e domejos No fai veilla gallinas ni capos, E s'anc fos francs, ar es sers ses doptanza. |
Metrical pattern: 361b