home page ?


Ben aja ieu, qar sai cobrir
Alegran ma dolor.
Ben aja ieu, qar no.m acir,
Sitot no.m jau d'amor.
Bel aja ieu, qar sui ficels amaire,
Ben aja ieu, qar non sui galiaire.
Ben aja ieu, qar amei la gensor,
Qi si'al mon e tota la meilhor,
E mal aja cui pesa.

Ben aja ieu, quar sai jaucir
Tan avinen seinhor.
Ben aja ieu, qar sai grazir
Qui.m fai ben ni honor.
Ben aja ieu, qar sui lials celaire,
Ben aja ieu, q'avols gens no.m platz gaire.
Ben aja ieu sobre tot amador,
Qar tan astrucs non jac sotz cobertor,
E mal aja cui pesa.

Ben aja ieu e mei suspir,
Qar m'an tan de sabor.
Ben aja ieu, qar sai sufrir,
Sitot d'als no.m socor.
Ben aja ieu e.l filha de sa maire,
Ben aja ieu, qar l'am ni.n sui laucaire.
Ben aja ieu e lauzengier tristor,
Q'estiers lur grat chanterai cui qe plor,
E mal aja cui pesa.

Ben aja ieu, si ja l'aus dir
Mon voler dinz sa tor.
Ben aja ieu, si.m deinh'auzir
Ses blasm'e ses follor.
Ben aja ieu, qar conosc son repaire,
Ben aja ieu, si placer li sai faire.
Ben aja ieu, qar m'a per servidor,
Qar mais nulls temps no virarai ailhor,
E mal aja cui pesa.

Ben aja ieu, qar non cossir
Mas de sa gran valor.
Ben aja ieu, qar ses mentir
Lau segur sa lauzor.
Ben aja ieu e.l franca de bon aire,
Ben aja ieu e ma domn'e ma maire,
Ben aja ieu e ma domna major.
E.l rei Peire salv Dieus com lo meilhor,
E mal aja cui pesa.

Perchatz, vai tost a N'Audiart e cor,
Q'estiers autra non sai ges de meillor,
E mal aja cui pesa.