| prosody | miscellaneous |
Non es savis ne gaire ben apres Cel qe.s blasma d'Amor ni mal en ditz: Q'Amors sap gent donar gaug als marritz E fai tornar los mals adauz cortes E chascun fai de falhimen gardar, Qe gent la sap car tener e celar! Et als faillitz don'avinen perdo E.l fin amant son per lei car e bo. Ben aja.l temps e.l jorns e l'ans e.l mes Q'el dolz cors gais, plagenters, gent noiritz, Part los meillors desiraz e grazitz, De leis q'es tant complida de toz bes, Me saup ferir el cor d'un dolz esgar, Don ja no.m voil departir ni sebrar! Qar ges non es domna, ni er, ni fo De tan bos aibs ab tan gentil faisso. Anc mais a nul aman tan be ne pres Ni tan no fo de fin joi enriquitz, Com eu cel jorn qe mos chanz fo auzitz Per vos, dompna, e.us plac q'eu retraisses Vostra lauzor e.l prez complit e car! E s'eu sai re d'avinen dir ni far, Vostra beutat e l'honor n'ochaiso, Q'eu teing engal d'un complit gazerdo. Tant m'aves dat pos qe m'agues conqes, Per q'autre dos per mi no.us er qeritz! Mas vostre cors part los meillor chauzitz Sap qe.s cove gardar en totas res! Pero cel qi ses qere vol donar, Be fai lo dos mai mil tans a prezar! Q'eu ai ben vist ses qere far ric do, E dos qeritz mermar lo meil del pro. Mon ferm voler, donn', ai tant en vos mes, Qe ja no.n er deloignatz ni partitz, E car d'Amor soi pres e conqeritz, Ben dei rendre d'esta preizon merzes! Be fo astrucs qi primier saup amar, C'om qu'es cortes en sap melhs eschivar Enoig, vilania e failliso, Per qu'eu estauc en bona sospezo. Seigner Guillem Malaspina, Deu gar Vostra valor e.l pretz complit e car. Q'en vos trob'om joi e solaz e do, Per q'eu vos voill presentar ma chanso. |