prosody | miscellaneous |
De chantar m'era laissatz Per ira e per dolor Qu'ai del comte, mon senhor! Mas pos vei qu'al bon rei platz, Farai tost una chanso, Que porte en Arago Guilhems e'N Blascols Romieus, Si.l sos lor par bons e lieus. E s'ieu chant cum hom forsatz, .................................................... Non tengatz per sordeyor Mon chan, que.l cor m'es viratz De lieis on anc non aic pro, Que.m gieta de sospeisso! E.l partirs es me tan grieus Que res non o sap mas Dieus. Traitz sui et enganatz A lei de bon servidor, Qand hom li ten a follor So don degr'esser honratz! E n'aten tal gazardo, Cum selh qui ser a fello! Mas se derenan sui sieus, A meins me tenh que Juzieus. A tal domna.m sui donatz Que viu de joi e d'amor E de pretz e de valor, On s'afina si beutatz Cum l'aurs en l'arden carbo! E quar mos precs li sap bo, Be.m par que.l segles es mieus E que.il rei tenon mos fieus. De fin joi sui coronatz Sobre tot emperador, Quar de filha de comtor Me sui tant enamoratz, Et ai mais d'un pauc cordo Que Na Raimbauda.m do, Que.l reis Richartz ab Peitieus Ni ab Tors ni ab Angieus. E sitot lop m'appellatz, No m'o tenh a deshonor, Ni se.m baton li pastor Ni se.m sui per lor cassatz! Et am mais bosc e boisso No fatz palaitz ni maizo, Ni ab joi li er mos trieus Entre vent e gel e nieus. Bels Sembelis, Saut e So Am per vos et Alio! Mas car la vista.m fo brieus, En sui sai marritz e grieus. La Loba ditz que seus so Et a.n ben drech e razo, Que, per ma fe, mielhs sui sieus Que no sui d'autrui ni mieus. |