home page ?


A per pauc de chantar no.m lais,
Quar vei mort jovent e valor
E pretz, que non trob'on s'apais,
C'usquecs l'enpeinh e.l gieta por!
E vei tant renhar malvestat
Que.l segl'a vencut e sobrat,
Si qu'apenas truep nulh paes
Qu'el cap non aj'a son latz pres.

Qu'a Rom'an vout en tal pantais
L'Apostolis e.lh fals doctor
Sancta Gleiza, don Dieus s'irais!
Que tan son fol e peccador,
Per que l'eretge son levat.
E quar ilh commenso.l peccat,
Greu es qui als far en pogues!
Mas ieu no.n vuelh esser plaies.

E mou de Fransa totz l'esglais,
D'els qui solon esser melhor,
Que.l reis non es fis ni verais
Vas pretz ni vas Nostre Senhor.
Que'l Sepulcr'a dezamparat
E compr'e vent e fai mercat
Atressi cum sers o borzes:
Per que son aunit siei Frances.

Totz lo mons torn'en tal biais
Qu'ier lo vim mal et huei peior!
Et anc pus lo guit de Dieu frais,
Non auzim pueis l'Emperador
Creisser de pretz ni de bontat.
Mas pero s'ueimais laiss'en fat
Richart, pus en sa preizon es,
Lor esquern en faran Engles.

Dels reis d'Espanha.m tenh a fais,
Quar tant volon guerra mest lor,
E quar destriers ferrans ni bais
Trameton als Mors per paor:
Que lor erguelh lor an doblat,
Don ilh son vencut e sobrat!
E fora miels, s'a lor plagues,
Qu'entr'els fos patz e leis e fes.

Mas ja non cug hom qu'ieu m'abais
Pels rics, si.s tornon sordeyor!
Qu'us fis jois me capdell'e.m pais
Qui.m te jauzent en gran doussor
E.m sojorn'en fin'amistat
De lieis que plus mi ven a grat:
E si voletz saber quals es,
Demandatz la en Carcasses.

Et anc no galiet ni trais
Son amic ni.s pauzet color,
Ni.l cal, quar selha qu'en leis nais
Es fresca cum roz'en pascor.
Bell'es sobre tota beutat
Et a sen ab joven mesclat:
Per que.s n'agrado.l plus cortes
E.n dizon laus ab honratz bes.