home page ?


Car m'era de Joi lunhatz,
Ai estat longa sazo
De joi e de far chanso!
Mas entre la neu e.l glatz
Restaur alegrans' ab joc,
E s'ieu ai joc ni plazer,
Non cre que.m denh estener
Que no.m fassa semblan jauzen e gai,
Pos atressi.m marrisc, can mal m'estai.

Car a mi par malvestatz,
Ja sia c'om s'en razo,
De calacom occaizo
D'esser jauzenz o iratz
S'us quecx no par per son loc!
E s'al loc no fai parer
S'ira o son bosaber
Escontra so q'el a tort de l'esmai,
Per nonchalen lo tenc e per savai.

A cui Fis-Jois es donatz,
Francs e de bela fayso,
Ab fin cor plazen e bo,
Tanh qu'en cresca sos solatz.
E sabetz per que.us o moc
C'us feinhentz ses tot valer
Vol aitan de joi aver
Co.l pus cortes! e gardatz si s'eschai!
Que petit val ab ir' e meins ab jai.

Pois vei us fols, parliers, fatz
Lausengiers,--cui Dieus mal do--
E neus cujon esser pro!
Pero lur fait son malvatz
Qu'ilh pujnon a mon enoc
Tan que midons fan temer
Si qu'ieu non l'aus ges vezer.
E.n soi dolens e.m vir d'ir'e d'esmai,
Car totz vezers contral sieu me desplai.

Fis-Jois plazens e prezatz,
S'ieu per lauzengier felo
Pert ma bon' entensio,
Mot vos sera grans peccatz.
C'anc res tan amar non poc
Can vos, on ai mon esper.
Doncx no.us fass' erguelh voler
Ni lausengiers cabals non crezatz mai
Que desfan so que dreitz e merces fai.