home page ?


Be.m cujava que no chantes oguan,
Si tot m'es grieu, pel dan qu'ai pres, e.m peza
Que mandamen n'ai avut e coman
D'on tot mi plaz, de midons la Marqueza.
E pus a lieys ai ma chanso promeza,
Ben la dei far cuenhd' e guay' e prezan
Quar ben conosc que, si.l ven en talan,
Qu'en mans bos locs n'er chantad' ez apreza.

Apreza n'er, mais ieu no sai cum chan.
Quom pus hi ai tota ma ponha meza,
A penas puesc far ni dir belh semblan,
Tant s'es ira dins en mon cor empreza!
Que, si a lieys, que a m'amor conqueza,
Non plai qu'em breu me restaure mon dan,
Ja de mos jorns no.m metrai en afan
Que ja per mi si' autra domn' enqueza.

Enqueza non qu'en un loc solamen
Amiey ancse, e ja a Dieu non playa
Que ja vas me fas'aital falhimen
Qu'autra.m deman e que de lieys m'estraya.
Tostemps l'aurai fin'amor e veraya,
E son d'aitan el sieu bon chauzimen
Que, si per lieys non cobre jauzimen,
Hie.us pleu per me que jamais joy non aya.

Joy aurai hieu, s'a lui plai, e breumen,
Qu'ieu cug e crey qu'ilh no vol qu'ieu dechaya,
E per aisso mia no.m espaven
Qu'auzit ai dir que mal fai qui s'esmaya.
A, doussa res, cuenda, cortez' e guaya
Per vos sospir e plor e planc soven,
Quar no sentetz la gran dolor qu'ieu sen,
Ni ges non ai amic que la.us retraya.

Mas ieu retrai, dona, soven de vos,
Quan suy ab luy, cui aus dir mon coratge,
Las grans beutatz e.ls vostres fagz tan bos,
Qu'a tota gen venon ben d'agradatge!
.......................................
Tro que del tot me falha.l companhos.
Qu'enaissi m'es lo parlar saboros,
Qu'autre conort non ai de mon dampnatge.

Dampnatge m'es quar no suy poderos
De lieys vezer, que ten mon cor en guatge,
Et estau sai, don totas mas chansos
Tramet ades, quar las vol, per uzatge
A Tot-mi-plaz, la belha d'aut paratge!
E plagra.m pauc chans, si per lieys no fos,
Mas qui lieys e ni sas plazens faissos,
No.s pot tener de joy ni d'alegratge.

En Tot-mi-plai, mout vos ai en coratge
Et am vos mout, ses totas ochaizos,
Qu'apres midons res non am tan quan vos,
Et es ben dregz qu'ilh n'aya l'avantatge.