home page ?


Ren no val hom joves que no.s perjura
Per salvar plus cant el tol sagramen!
E s'ieu per mal ni per paor de ven
Covenc a Dieu qu'eu non chantes aura,
Pos nostre temps si meillura,
Trobarai que fort ai mespres.
Perdon me Dieu si l'ai repres

En respeig son d'aver bon' aventura,
Car ades ai maltrag e mon joven!
Mas anc no.m plac sojornz entr'avol gen,
Per c'ai maint jorn e mainta noit escura
Suffert e chaut e freidura,
Qe.m loingnes de vil' e paes
Per segre comte pro e cortes.

Jamais nuls hom non faria rancura
De mercadiers, so sai certanamen,
Si vezia com gazaignon l'argen
Ni co.s meton en mar ad aventura.
De tot me sui donatz cura,
Can an bon temps e non l'an ges,
Tot m'o teng a sojorn de pres.

Anc la bella ben faita per centura
Non desirei mais c'ara per un cen
Non dezir mais e garbin e ponen,
Et autres venz, can si fan per mesura.
Et nel port a gran largura,
C'om conosca can bons temps es,
En Blachas non o sap ges res.

S'anc baordei ni anei d'ambladura,
Per caval pren nostra nau can cor gen,
E per escut la gran vela al ven,
E per lansa l'antenna fort e dura,
E per esperon l'amura,
E.ls timos prenc ades per fres
Et per sella e per arnes.