prosody | miscellaneous |
Tot mon engeing e mon saber Ai mes en un joi qe.m soste, Quan mi remembra ni.m sove Tan bona dompna.m fai chantar. Adoncs mi deuri' esforsar Cum pogues far mon chan valer, Si ben trac greu martire D'amor, cui soi servire. Amors m'a si en son poder E m'a fach comensar tal re Qu'ieu non puesc a mal ni a be Trair' a cap plus qu'al cel montar. Per la genssor c'om pot trobar, Gardatz si.m deuri' escazer Qu'ieu l'am tant e dezire Qu'ailhors mon cor non vire. Eu l'am mais que non fatz parer E parli.n mais que no.s cove! Mais vuoill que m'aucia dese Si ja mais m'en auzetz parlar Ni ab dreich semblan esgardar, Tant sai cubertamen tener E celar mon dezire Ab jogar et ab rire. Lo reproviers non ditz ges ver Que cors oblida c'uoills non ve. Ans a ben failhit enves me, Qu'ieu no la puosc er oblidar, La bella cui non aus preiar, Tan tem failhir al sieu voler, Per qu'ieu planc e sospire. Ai Amors no.m aucire La nuoich qan sui anatz jazer E.l jorn maintas ves s'esdeve, Cossir com li clames merce Qand ab lieis poiria parlar. Adoncs m'o sai ieu ben pensar E bos motz triar e vezer E ma razon assire! Pois lai no sai que dire. Ai las cum cuidava aver Qualque pro en ma bona fe Cum plus sui desesperatz, cre C'amors mi degues ajudar. Eras no m'en sai conseillar, Mas atendrai al sieu plazer. Grieu er d'amor jauzire Qui no.s es francs sofrire. E.l vers non es a dire Ses qui be.l sapcha dire. |