home page ?


D'eissa la razon qu'ieu suoill
M'er a cantar per usatge,
Que mal mi son' e m'acuoill
Ma dompn' el sieu senhoratge.
Be.m trahiron siei beill huoill
Com a fals messatge
Qan mi meiron el coratge
S'amor don mi duoill.

Si.m fai tort ni.m mostr' orguoill,
A mi es fer' e salvatge,
C'ades l'am plus e la vuoill
Que non puosc penr' autre gatge.
Vestitz e qan mi despuoill,
Pensi mon dampnatge
E conosc que gran folhatge
Fatz quar no m'en tuoill.

Tolre non puosc eu ges me
Per mal qu'elha.m fassa traire.
Anz mi platz, sabetz per que
Conoissera s'ieu l'am guaire,
Que ja non er hom mai be
Vertadiers amaire,
Tro que no s'en pot estraire
Per neguna re.

Molt mi platz, per bona fe,
Quant aug de mi dons retraire
L'onor e.l pretz qu'ilh mante,
C'ab lieis sui, so m'es vejaire.
E qan cossiriers m'ave
De nuill autr' afaire
S'amors me ven tost desfaire.
Ve.us lo pro que.m te

Tant n'ai estat engoissos
E sofert pen' e martire
E greus trabaills perillos
Que de l'esperanza.m vire.
Era sivals, s'eu en fos
Al derrier gauzire,
Conosc c'aprop lo dezire,
Fora.l jois plus bos.