home page ?


S'ieu en chantar soven
No m'atur ni m'aten,
No-n cuidetz que sabers
M'en failla, ni razos
Ni talans amoros,
Que-l plus de mos volers
Es en joi et en chan,
E de razo ai tan
Que chantar en poiri'asatz,
Mas tot quan sai non vueill sapchatz.

C'amat ai lonjamen
Tal don' ad essien
C'anc servirs ni plazers
No mi poc esser bos,
Ni preiars ni chansos
Ni celars ni temers,
Qu'ieu no-i trobes enguan!
Et ieu, sofren mon dan,
Saup l'enguanar totz enguanatz
E remaner ab liei en patz.

Qu'estiers no-m fora gen,
Pueis del sieu faillimen
Era vis lo parers,
Qu'ieu l'enserques sos pros
Entro que d'ambedos
Fos pres enguals lezers!
Que s'ill fes son talan
Ieu mi vau percasan,
Et es plus adreitz lo mercatz
Que si-m partis de lieis iratz.

Drutz que de sidons pren
Nuill autre venjamen
No sap que s'es jazers,
Que maldigz e tensos
Faun d'ensenhat janglos,
E pueis non es tot vers
Quan dona fai semblan
Qu'ill vol que la deman
Tals que ja no-ill sera privatz
E si s'en tenra per paguatz.

Que quant ieu mi prezen
En loc de chauzimen
Non es mos capteners
Lauzengiers ni ginhos!
Ans plus temens c'us tos
Soi lai on es poders.
E don mi Dieus aitan
Trobar dona prezan
Que-l guizardos m'en si'onratz,
Quan serai per lieis trebaillatz.

Tot quant es de joven
E de ric pretz valen
Te la Marquez' aders
De Menerba sai jos,
Si c'a pauc entre nos
No pueja sos valers!
Qu'enemiguas en blan,
E sospir quar no-l sui denan,
E pueis de lai no-m n'eschai gratz
No-m n'atanh sai enemistatz.

Mais d'amic, on qu'ieu m'an,
Vos es caps de mon chan
E de Miraval poestatz,
Mas no vueill que l'anel perdatz.