home page ?


Amors me fai chantar et esbaudir,
E-m tolh deport ab cossirier que-m dona,
E torna-m tot mon solatz en cossir!
Que si non es ma chansos sobrebona
No-n dey esser aissi del tot blasmat:
Pero si cug chantar a voluntat
D'entendedors e de drutz e d'amiguas.

Mas no vuelh ges a donas cossentir
So per qu'a dreg vey qu'om las ochaizona,
Que tals n'i a que no volon auzir
El temps qu'om plus d'amar las arazona:
Pueys quan jovens lur estraj sa beutat
Prendo-l sordeys qu'avion soanat,
Aissi cum fes lo Lombartz de las figuas.

Bona domna no-s deu d'amar gequir!
E pus tan fai qu'az amor s'abandona,
No s'en cog trop ni massa non o tir,
Quar meins en val totz faitz qu'il dessazona:
Mas sapcha ben celar tota vertat,
Que silh qu'en als li serion privat
Ad ops d'amar li serion destriguas.

Ges la belha qu'ieu plus am no s'albir
Qu'en re l'ensenh ni-l casti ni-l despona,
Qu'ilh sap tan gen laissar e far e dir
Per que no-m cal que ren als hi apona:
E pus li platz que-m retenh'a celat,
Per tres razos don tug drut son amat
Li serai bos, messatgiers, so li-m diguas.

S'ieu ja ren fauc don ma dona s'azir
No-lh perdon Dieus si elha m'o perdona,
Quar no la vuelh gualiar ni trazir,
Ni razonar so qu'elha malrazona!
Tot m'es honors quant a lieys si 'onrat,
E grazisc tot so qu'a lieys ven a grat!
E vuelh aver guerras et enemiguas.

Bona domna, on qu'aia domneiat,
Vuelh que tenguatz Miraval domeniat
E mas chansos en cap d'autras amigas.

Si tot m'aves, Mais d'amic, cor irat,
A vostr'ops ai Miraval si gardat,
Que vos l'aves et eu n'ai enemigas.

Mantel, de sen, de pretz e de beutat
E de joven vos vei tan gen onrat,
Que sai ne son mantas domnas enigas.